Talamonū ‘a e ‘Eiki Palēmia ki he timi netipolo Tala 

21 Siulai 2022

Na’e fakahoko atu ‘e he ‘Eiki Palēmia, Hon. Hu’akavameiliku ‘i he ‘ahoʹ ni ‘a ‘ene popoaki talamonū ki he timi Netipolo Fakafonua ‘a Tonga, Tala, ‘i he’enau ikuna’i ‘a ‘enau ‘uluaki va’inga pea mo e timi netipolo ‘a Ha’amoa ‘i he fe’auhi ‘a e ngaahi Fonua ‘o ‘Osenia ke kau ki he Ipu ‘a Mamani 2023 ‘a ia ‘oku lolotonga fakahoko ‘i Suva, Fisi.

Na’a ne talamonū foki ki he timi ‘i he ‘enau kau atu ki he fe’auhi ‘a e ngaahi Fonua ‘o ‘Osenia ke kau ki he Ipu ‘a Mamani 2023 ‘a ia ‘oku fakahoko ‘i Suva ‘i he uikeˊ ni.

Na’e ikuna’i ‘e he Tala ‘a e timi ‘a Ha’amoa ko e 69-52, ‘i he va’inga malie mo fakaholomamata mo’oni, na’a nau tuli kai hake ‘i he kuata hono ua ‘o nau taki aipe ‘a e va’inga ‘o a’u ki he ‘osi ‘a e taimi.

“‘Oku ou fakafofonga’i ‘a e Pule’anga ‘o ‘Ene ‘Afio, Kapineti mo e kakai ‘o Tonga ‘i he talamonū ki he timi netipolo Tala pea mo e fakatauange ki he faiako pea mo e timi ke nau ma’u ha va’inga lelei ‘i he fe’auhi ‘oku lolotonga fakahoko,” ko e me’a ia ‘a Hon. Hu’akavameiliku.

‘Oku ma’u ‘e he timi Tala e faingamalie ke nau fakatahataha’i ‘a e kakai Tonga kotoa pe ‘i he ngaahi ‘aho ka hoko mai pea mo e faingamalie ke nau kau atu ‘i he va’inga mo e ngaahi timi lelei taha ‘a mamani.

‘E hokohoko atu ‘a e va’inga ‘a e Tala mo Fisi ‘i ‘ahoʹ ni (Siulai 20), Papua Niu Kini ‘i ‘aho 21 ‘o Siulai pea mo Cook Islands ‘i he ‘aho 22 ‘o Siulai ai pē.

Ko e ongo timi tu’ukimu’a ‘i he fe’auhi te na hoko atu ‘o kau ki he fe’auhi Ipu ‘a Mamani ‘i he Netipolo 2023 ‘e fakahoko ‘i Cape Town, Saute ‘Afilika mei he ‘aho 28 ‘o Siulai ki he ‘aho 6 ‘o ‘Aokosi, 2023.

Leave a Reply

Your email address will not be published.