Foaki e me’amalu’i fofonga ‘e 100,000 mei Suisalani ki he Pule’anga
16 Sepitema 2022
Nuku’alofa- Na’e foaki ki he ‘Eiki Palēmia Le’ole’o, Hon Samiu Kuita Vaipulu ha me’a’ofa me’amalu’i fofonga (masks)’e 100,000 he pongipongi ‘o e ‘aho ni, mei he Konisela Seniale ‘o Suisalani ki Tonga, Mr. Carl Sanft.
Ko e foaki eni ‘a Suisalani ‘a e ngaahi me’a malu’i fofonga ni, hili ha kole mei he ‘Eiki Palēmia, Hon. Hu’akavameiliku, he konga kimu’a ‘o e ta’u ni, pea ‘e tufa ke ngaue’aki he fanauako he ‘otu Tonga ni.
Na’e me’a ‘a e ‘Eiki Palēmia Le’ole’o, Hon Samiu Kuita Vaipulu, ‘o fakahā ‘a e hounga’ia ‘a e Pule’anga ki he Pule’anga Suisalani he tokoni kuo fakaa’u mai’o fakafou mai ‘i he Konisela.
“ Ko e tokoni eni ke fakapapau’i ‘e malu’i ‘a ‘etau fanau he ngaahi ako’anga, ko e kaha’u ia ‘o e fonua ni, pea tokoni ‘a e me’a malu’i fofonga ni ki he’enau faka’ehi’ehi mei he mahaki Koviti-19,” ko e me’a ia ‘a Hon. Samiu Kuita Vaipulu.
Na’e fakaa’u mai ‘a e tokoni ko eni ‘o fakafou mai he SDC Regional Disaster Risk Management Hub ‘o e ‘Ofisi Faka’amipasitoa ‘o Suisalani ‘i Taileni mo e ‘Ofisi ‘i Uelingatoni, Nu’usila.
Na’e fakahā ‘e Carl na’a ne fakaa’u ‘a e kole mei a Hon Hu’akavameiliku ki he ‘Ofisi Faka’amipasitoa ‘o Suisalani ‘i Nu’usila, pea na’a ne fiefia na’e tali lelei ‘a e fakatangi ni.
“ ‘Oku mau fiefia ke tokoni’i ‘a e fanau ‘o fou he foaki ko eni,” ko e me’a ia ‘a Carl.
Na’a ne me’a ko e tokoni eni na’e fakaa’u mai ia mei he ‘Amipasitoa Suisalani ki Tonga, HE Michael Winzap ki he Potungaue Ako mo e Akongaue.
Neongo ‘a e ngaahi pole ‘oku fehangahangai mo e Koviti 19, mo ‘ene hoko ke laveangofua ai e mo’uilelei ‘a e fanau mo e fanauako, ‘oku hounga ia ki he Pule’anga Tonga ‘a e tokoni kuo a’utaki mai mei he Pule’anga Suisalani.
Na’e me’a he polokalama ni ‘a e kau ‘ofisa mei he Potungaue Ako mo e Akongaue, Potungaue ki Muli mo e ‘Ofisi ‘o e Palēmia. ‘E tufaki ‘a e ‘ofa ni ‘e he Potungaue Ako mo Ako Ngaue.
