14 ‘Okatopa 2020

Kuo kakato ‘a e ‘i ‘Eua ‘a e ‘Eiki Palemia, Hon Dr. Rev. Pohiva Tu’i’onetoa pehe ki he hou’eiki Minisita ‘o e Kapineti ki he ouau lotu fakama’u mo e vete ‘aukai fakafonua he mahina kotoa, ‘a ia na’e fakahoko ‘a e mahina ko ‘Okatopa ki he Fungafonua, ‘Eua.

Ko e ouau ni na’e fakahoko e Polokalama Fakama’u ‘Aukai ki he Fale Fakataha’anga Malau ki Angaha ‘o tataki ‘e he Siasi Uesiliana Tau’ataina ‘o Tonga mo Faiafekau ‘Opeti Fangupo, ko e Faifekau Pule ‘o e Vahefonua. Ko e ouau vete ‘aukai ne tataki ia ‘e he Siasi Katolika Loma, ‘o tataki ‘e he Patele tauhi palokia ‘Eua, Patele PAea-‘i-muli Vainikolo.

Lolotonga ‘a e ‘i he Fungafonua ‘a e ‘Eiki Palemia mo e kau muimui folau na’e lava ai mo e ngaahi polokalama kehe hange ko hono faka’ilonga’i ‘a e ngaue ki hono fakalelei’i ‘o e Fale fakataha’anga Malau ‘i Angaha ‘i he Falaite 9 ‘o ‘Okatopa pea fakahoko ki he Malau Hall mo e foaki tohi fakamo’oni fakamalo’ia’i e lavame’a ‘o e kakai ‘o ‘Eua he ngaahi mala’e kehekehe.

Na’e ‘a’ahi he Tokonaki 10 ‘o ‘Okatopa ‘a e ‘Eiki Palemia ki he lingi’anga veve fo’ou ‘a ‘Eua ‘i Angaha pehe ki he toutu’u ‘a e kainga Petani ‘i Ha’atu’a moe ngoue’anga ‘a e tangata fa’a ‘iloa ‘o ‘Eua ko Manase Siua moe toutu’u ‘a e To’utupu ‘a Tongamama’o. Na’e me’a atu aipe ‘a e ‘Eiki Palemia ki he Pilisone Sainai.

Na’e hoko atu ki he faka’ilonga’i ‘o e mata vai fo’ou ‘a e Poate Vai ‘a Tonga ‘i Kenani.

Na’e tatuku’aki ‘a e polotu fakafeta’i ki he Falelotu Siasi Uesiliana Tau’ataina ‘o Tonga ‘o ‘Ohonua ‘i he po Sapate 11 ‘o ‘Okatopa ke faka’ilonga’i ‘a e kakato ‘o e ta’u ‘e taha ‘a e ngaue ‘a e Pule’anga ko eni. Na’e tefua ai ha lauafe mo e ngaahi kauhiva kehekehe ‘e 10 tupu mei he ngaahi siasi kotoa ‘i he Vahefonua ‘Eua

Kimu’a pea liu e folau ki Tonga’eiki ne me’a ‘a’ahi atu e tangata’eiki Palemia ki he Palasi Fakatu’i ki he tukunga e ngaue kuo lava mo e uafu Nafanua.

Na’e foki mai e folau ki Tongatapu ‘i he Monite 12 ‘o ‘Okatopa.

Tu’uta ‘i ‘Eua