Ngaahi lokiako fo’ou ma’a e GPS Niutoua
Na’e faka’ilonga’i ‘e he ‘Eiki Palēmia Hon. Rev. Dr. Pohiva Tu’i’onetoa ‘a e ngaahi lokiako fo’ou ‘o e Lautohi Pule’anga Ha’amonga ‘i Niutoua ‘i he Pulelulu, 14 ‘o ‘Aokosi 2020.
Na’e fakaha ‘e he ‘Eiki Palemia, ko e langa e ngaahi lokiako fo’ou ‘e nima, ko e ngaahi lokiako ‘oku malohi, malu mo ne matu’uaki ha afā malohi mo e mofuike ‘o hange ko e taumu’a ‘o e langa fakaakeake mei he Saikolone ko Kita. Na’a ne fakamalō ai ki he tokoni mai ‘a e Pule’anga ‘Aositelēlia mo e Pangikē ‘a Mamani ki he langa fakaakeake ‘o e Sekitoa Ako.
Na’e me’a ‘i he ouau ni ‘a e Talafekau lahi ‘a ‘Aositelēlia ki Tonga ni, H.E. Adrian Morrison, ‘Eiki Minisitā ‘o e MEIDECC Hon. Poasi Mataele Tei, ‘Eiki Minisitā ‘o e Ako Hon. Siaosi ‘Ofakivahafolau Sovaleni, Sekelitali Pule mo e Sekelitali ki Kapineti, kau Pule Ngaue, ngaahi matu’a, fanauako mo e kau fakaafe tokolahi.
