“Talitali lelei ‘o e kau taki mei he Pasifiki, ui mei he ‘Eiki Palēmia ke toe leleiange ‘a e faingamalie ki he pa’anga tokoni ki he feliuliuaki ‘a e ‘eá”

14 Sepitema 2022

Honolulu, Hauai’i- Na’e fakaava ‘a e Konifelenisi hono 12 ‘a e kau Taki ‘o e Pasifiki (Pacific Island Conference of Leaders –PICL), ‘i hono 12 ‘o Sepitema, 2022 ‘aki ha ouau ‘ilo kava faka-Hauai’i ma’a e kau taki ‘o e Pasifiki mo e kau fakafofonga ki he fakataha, ‘i he East West Centre ‘i Honolulu.

Na’e kau fakataha atu ‘a e ‘Eiki Palēmia ‘o Tonga, Hon. Hu’akavameiliku mo e kau taki mei he ‘Otu Motu Kuki, ‘Otu Motu Fakatahataha ‘o Maikolonisia, Fisi, Tahiti, Kuamu, Hauai’i, Lepupilika ‘o e ‘Otu Masolo, Naulu, Niue, ‘Otu Motu Maliana, Lepupulika ‘o Palau, Ha’amoa, ‘Otu Solomone mo Tuvalu. Na’e kau mai ki he fakataha ‘i he tekinolosia zoom ‘a e kovana ‘o Ha’amoa ‘Amelika.

Na’e hoko atu ‘a e fakataha ki he feme’a’aki ‘a e kau taki mo e kau fakafofonga mei he tukuifonua ‘oku ‘ikai ke nau memipa he PICL mei ‘Esia-Pasifiki, ‘i he ngaahi kaveinga fekau’aki mo e fiema’u vivili ‘a e fonua takitaha ‘i hono fakahoko ‘e he fakafofonga ‘o e fonua takitaha (penolo), kau ai ‘a e kaveinga ki he feliuliuaki ‘a e ‘ea, fakalakalaka ‘e tu’uloa; malu’i ‘o tahi, huhu malu’i Koviti-19, tokoni fakapa’anga ki he patiseti, fakapa’anga ‘o e ngaahi ngaue ki he feliuliuaki ‘a e ‘ea pehe ki he tauhi ‘o e melino mo e malu ‘a e fonua.

Na’e me’a ‘a e Palēmia ‘i he’ene tali ki he ngaahi penolo na’e fakahoko, ki he totonu ke ‘i ai ha toe founga vaveange mo pau ke fakalele’aki ‘a e pa’anga tokoni ki he feliuliuaki ‘a e ‘ea mo tokoni ki hano fokotu’u ha sino’i pa’anga tokoni fakafeitu’u ma’a e Pasifiki.

Na’e kau atu ‘a Tonga mo hono kau fakafofongá ki he fuofua fakataha ‘a e Kulupu Ngaue ‘a e PICL, ‘a ia na’e fili ai ‘a e seá mei he ‘Otu Motu Fakatahataha ‘o Maikolonisia.

Na’e lava mo e fakataha ‘a e ‘Eiki Palemia mo e ‘Ofisi ‘o e Va’a ki Muli mo Fefakatau’aki ‘a ‘Aositelēlia ki he Pasifiki pehē ki he ‘Ofisi ki he Malu ‘o e Fefōlau’aki Sivile ‘a e Pasifiki(PASO). Na’a ne ma’u faingamalie ai ke fe’iloaki mo e Palesiteni ‘o e East West Centre, Suzanne Vares-Lum pehē kia Kuhio Lewis, ko e ‘Ofisa Pule (CEO) ‘o e Council for Native Hawaiian Advancement (CNHA). Na’e fakahoko atu ai ‘e he ‘Eiki Palēmia, mo e fakamalō mo e hounga’ia ki he tokoni ma’a Tonga mei he CNHA fe’unga mo e US$147,000.

-NGATA’ANGA-