16 Ma’asi 2022

Nuku’alofa – Na’e fakaa’u atu ‘e he Tokoni Palēmia, Hon. Poasi Mataele Tei, ‘a e fakamalō ‘a e Pule’anga ki he ‘Famili Pasifiki’ ki he tokoni kotoa kuo nau fai ma’a Tonga he uike ‘e ono kuo maliu atu, hili ‘a e fakatamaki ‘o e mapuna ‘a e mo’ungaafi Hunga-Tonga-Hunga-Ha’apai mo e peaukula na’e hake ‘i Sanuali 15.

Ko e me’a fakamalō eni ‘a e Tokoni Palēmia ‘i he polokalama fakamavae ki he kau sotia mei he Va’a Fakakautau ‘a ‘Aositelēlia (ADF), Va’a Fakakautau ‘a Fisi(RFMF) mo e Va’a Fakakautau ‘a Falanise-Niukaletonia ‘i he Uafu Vuna he ‘aho ni, Pulelulu 15 Ma’asi.Ko e ngaahi va’a fakakau tau eni ‘e tolu na’a nau fengāue’aki he Polokalama “Tokoni ma’a Tonga’, ‘i he kole tokoni mei he Pule’anga Tonga.

“Ko e ‘aho ni ‘oku ou fie fakaa’u atu mei he Pule’anga mo e kakai ‘o Tonga ‘a e fakamalō lotohounga, ‘malo ‘aupito’, he ngaahi tokoni kotoa kuo mou fakahoko ma’a e kakai ‘o Tonga,” ko e me’a ia ‘a Poasi.

“’Oku ou fakafofonga’i atu ‘a e Pule’anga ‘o ‘Ene ‘Afio mo e ‘Eiki Palēmia, ‘a e fakamalō lotohounga’ia mo’oni ‘i he ngaue kafakafa kuo mou fakahoko ma’a Tonga.”

Na’e me’a ‘a Poasi ‘o fakahā kuo kamata e ngaue fakaakeake mo e polokalama langa fo’ou, ‘o kamata’aki e langa e ngaahi fale fo’ou ‘i Tongatapu.

Kuo tukutaha e tokanga ‘a e Pule’anga, ‘o hiki mei he tokoni faklatu’upake, ki he fakaakeake mo e langa fo’ou, ‘o fakatefito ‘i he langa ke toe leleiange.

Na’e fakahā ‘e Poasi ko e tokoni lahi na’e fakahoko he polokalama ni ki he savea ‘i he ngaahi feitu’u na’e uesia tamaki, tokoni ki hono fakaa’u e ngaahi tokoni mo e fiema’u ki he tukuifonua he ngaahi helikopeta, mo hono fakama’a e ngaahi veve he tukuimotu mo e kolo na’e uesia, ki he polokalama langa fo’ou.

‘Oku fika tolu ‘a Tonga ‘i mamani he tukuifonua ‘oku tu’u laveangofua ki he feliuliuaki ‘a e ‘ea, ‘a ia ‘oku tau fehangahangai mo ia faka’aho pe, ka ‘i ho’omou ala mai ke tau fetākinima mo e tokoni’i kimautolu “‘e he ngaahi kaungāme’a ‘oku fiema’u he taimi faingata’a ‘o hoko ko e mo’oni’i me’a ke mau falala mo nofo’aki ki he hokoatu.”

Na’e foaki atu ‘e he Tokoni Palēmia ‘a e ngaahi me’a’ofa ko e ngaue fakamea’a, tā tongitongi mo e kava-tonga ki he kau fakafofonga mei he tukuifonua ‘e tolu na’a nau ngaue tokoni.

Na’e me’a ‘i he polokalama fakamavae ni ‘a e Talafekau Lahi ‘Aositelēlia ki Tonga, HE. Ms. Rachel Moore, Kapiteni Jace Hutchison, Komanitā Pule ‘o e HMAS Canberra mo Mesia Jiuta Baleisolomone, taki ‘o e timi mei he Va’a Faka’enisinia fakakatau ‘a Fisi.

Na’e me’a ‘a Pilikatia Lord Fielakepa, ko e ‘Eikitau ‘o e Kau Tau ‘a ‘Ene ‘Afio ‘o fakamalō ki he ‘Famili Pasifiki’ ‘i he fetakinima he tokoni na’e fakahoko mai ki Tonga.

‘E foki atu ‘a e kau sotia mei Fisi he efiafi ni ki Fisi kae toki foki atu ‘a e HMAS Canberra ki ‘Aositelelia ‘i he Falaite.

Ko e manuao HMAS Canberra ko e taha ia he ngaahi manuao ‘Aositelēlia ‘e tolu na’a nau kau mai ki he Polokalama ‘Tokoni ki Tonga’, ‘o fetongi mai ‘a e HMAS Adelaide kuo foki atu he uike tolu kuo maliu atu mo e HMAS Supply.